- 349 -

1391. Nov. 14. Liegnitz.

Herzog Ruprecht versetzt für sich und als Vormund seiner Brüder der Stadt die Veste und das Haus Cotzenau mit Zubehör, dazu den See zu Koschwitz.

Wir Ruprecht von gotis gnadin herczog yn Slesien vnd herre czu Legnicz bekennen offintlich mit desym briue allen den, dy en sehen, horen adir lezin, daz vnser liben getrouwen burgermeyster vnd ratmanne mit rate, wissen vnd willen der eldisten, der geswornen ows allin hantwerken vnd der ganczin gemeyn vnser stat Legnicz durch vnser bethe wille, vnsern fromen groslich dorynne czu werbin, vff dy vorgenannte vnser stat Legnicz, vor vns vm vnsern willen dem strytstrengin ritter, hern Hannose von Schellindorff verkowft habin sechczig marg geldis ierlichs czinses czu wedirkowfe vm sechs hundirt marg grosschin, do mete wir von deme selbin hern Hannose von Schellindorff vnser feste vnd das hows Koczenow mit allin czugehorungin, alz sy von aldirs doczu gehorth habin, wedir czu vns gekowft vnd gelost habin. Dorumme wir obgenanter herczog Ruprecht von vnser wegen vnd von der hochgebornen fursten, herczog Wenczlowis, Bonczlowis vnd Heynrichs, vnser lyben brudere wegen, diedo von gotlichin gnadin auch mit vns erpherren syn czu Legnicz, der vormunde wir yczunt syn, daz dy egenante vnser stat Legnicz icht alczu hoch beswerit wurde, sundir von den vorgenanten sechczig marg czinszes wedirgelost vnd geledegit moge werdin, globin sy ane schadin da von czu brengin, des habe wir von vnser wegin vnd von der obgenanten vnser bruder wegin, mit rate vnsers getrouwen eldisten Stephan Rotkirchen, der yczunt vnser howptman vnd yorweser ist der vorgenantin vestin vnd gutis vnd auch alle andir dy hernoch howptmanne vnd vorweser do selbist gesaczt werdin, vorwyset vnd sy gewyset an dy vfftgenanten burgermeystere vnd ratmanne, dy yczunt syn vnd hernoch burgermeyster vnd ratmanne der vorgenanten vnser stat Legnicz gekorn werdin yn czu kunftegin czyten mit allin czugehorungin der vorgenantin vestin vnd hows Koczenow, beide, mit der heyde, holcze, weldin, tychen vnd vischeryen, vyetriften mit allirhande jagit, grosir vnd kleynir tyre, mit allirhande czeydilweyde vnd vogilweyde mit allirleye holcze, dorre vnd grune, mit allin nuczperkeyten, ffruchten, gemessen vnd czugehorungen der selbin vnser vestin Koczenow, nichtis usczunemen, mit allin czollen, ackern vnd wezin, mit dem cretschem vnd mit andirn allin czugehorungin der selbin vestin Koczenow, sy werdin hy benanth adir nicht benanth, dy wir en do vor vorsaczt vnd vffgelozin habin. Auch habin wir en vorsaczt vnd uffgelozin vnd an sy gewyset den sehe czu Cosschewicz des Legnitschen wichbildis mit allin synen czugehorungin, herscheften vnd nuczperkeyten, vornemelich doch mit allin wyntirczogin vnd andirn synen genisen, nichts aussgenomen, wy man dy benennet, sy werdin hy benant, adir nicht benanth, gancz vnd gar czu habin, czu besyczen vnd vormyeten vnd dy czinse alle iar czu hebin vnd czu genissen, czu allin herscheften vnd genissen, alz sy Hannus Kranch vnser houerichter czu Legnicz gehabt hot besessin vnd genossin, mit des gunst, wissen vnd willen wir das getan habin vnd den sehe vorsaczt habin. Auch hot her selbir Hannus Cranch des vorgenanten sehis der stat Legnicz abegetretin yn allir moze, alz her en gehabit hot vnd hot dy ffischer des sehis an dy stat Legnicz gewyset, wenn wir dem selbin Hannus Cranch sechs vnd czwenczig marg czinssz vff der obgenanten vestin vnd synen czugehorungin do vor vormacht vnd vorwyset haben, alz hernoch steet geschreben, doch mit sulchim vndirscheyde, daz der genante howptman der yczunt genanten vestin vnd howsis vnd auch dy hernoch howptmanne vnd vorweser doruffe syen vnd gesaczt werdin, alle iar vff sante Michilstag von der genanten vestin vnd alle synen czugehorungin vnd genissen, gebin vnd beczalin sullin ffyer vnd dryzig marg grosschin den vorgenanten burgermeystere vnd ratmanne, dy do yczunt syn und auch hernoch gekorn werdin mit den selbin vyer vnd dryzik, dy en der howptman alle iar gebin sal vnd auch mit den sechs vnd czwenczig marg czinsz, dy man von dem vorbenanten sehe czu Cosschewicz pflegit ierlich czu gebin vnd die egenanten burgermeyster vnd ratmannen alle iar von der stat Legnicz wegin habin sullin vnd hebin sullin sy hern Hannose von Schellindorff, deme obgenanten, dy sechczig marg czinsz, dy sy ym vor vns vorkowft habin, alle iar, dy wile sy nicht wedirkowft werdin, beczalin vnd vorrychten vnd wen dy egenanten vyer vnd dryzig marg von der ffestin vnd iren czugehorungen der stat gegebin werdin vnd gefallin, so sal der howptman der vff der egenanten vestin syn wirt, czu hand donoch gebin Hannus Cranch von der egenanten festin vnd gute sechs vnd czwenczig marg grosschin, dy wir auch ierlich an en gewyst haben von des sehis wegin czu Cosschewicz von der sechs und czwenczig marg czinsz wegin, dy man dovon gibt, des her der stat von vnser wegin abegetretin ist vnd wenne ym di gefallin vnd gegebin werdin, so sal der howptman, der do yczunt ist, adir her noch gesaczt vnd sien wirt vff der egenanten festin vnd howse, den vorgenanten burgermeyster vnd ratmannen, dy do yczunt syn vnd auch hernoch der stat Legnicz gekorn werdin, alle iar gebin vnd antworten alle nucze, fruchte vnd genisse, die dy geuallin yn vnd vff der egenantin vestin Koczenow, beide von der heide vnd von holcze, weldin, tychen, vyscheryen, vyetriften, weiden, von allirley holcze, von czollin, ackirn, wezin vnd von dem cretschem vnd von allin andirley czugehorungen der selbin festin Koczenow, also vorgeschrebin steet, keyns ussgenomen, von vns vnd den vnsern vngehindirt, vnd das sullin sie habin vnd hebin alle iar vnd also lange, bis das sy von den obirregin geniessin vnd fruchtin obir dy sechczig marg, dy sy alle iar von deme egenanten howse vnd sehe hebin sullin vnd hern Hannosen von Schellindorff gebin sullin, sich der egenanten sechs hundirt marg doran dirholen, do sie dy sechsig marg czinsz egenante mete wedirkowfen vnd abegelozin mogin. Auch mag der howptman des vorgenantin howsis eyne czytliche, togeliche czerunge ym behalden, der her bedurffin wirt czw eyme gewonlichen gesynde vff deme howse. Dy globde hot der vorgenante Stephan Rotkirche howptman, alz vor obene geschrebin stet, dy wile her howptman vnd vorwesir blibet, der egenantin festin alle iar czu haldin. Auch globe wir dem burgermeystere vnd ratmannen vnser stat Legnicz, das wir vorwert, ap sich der vorgenante Stephan aus der howptmanschaft czien wolde vnd nicht mer do syn wolde, keyn kowptman noch vorweser dar seczin wollin, is sy denne mit der vorgenanten burgermeyster vnd ratmannen rate, wissin vnd willin, vm weichin wir denne mit irem willen seczin vnd alz vffte, alz das geschiet, der sal sich vorlobin, dy egenante artikel vnd globde czu haldin, glichir wyze alz vorgeschrebin steet, doch also vornemelich, wenne der burgermeyster vnd ratmanne der stat Legnicz wegin sechs hundirt marke von den obiregin geniessen obir dy sechczig marg, di sy hern Hannose von Schellindorff alle iar gebin sullin, gehebin vnd en geantwort werden, so sal dy genante feste mit iren czugehorungen an vns vnd der egenante sehe an Hannosen Kranch alz vor wedirbekomen vnd gevallin vnd globin en von vnser wegin vnd von vnser obgenante gebrudirn herczogen Wenczlowis, Bonczlowis vnd Heynrichs dy obgenanten globde yn allin artikeln vnd punckten alsie vor beschrebin sten czuhaldin vnd wellin sy dobie genediclich beschuczin vnd behaldin. Des czu bestetegunge vnd czu sychirheyt habin wir en desyn briff gegebin vorsegilt mit vnserm gemeynen ingesegil czu Legnicz, noch gotis geburde vnsers lyben herrin dryczenhundirt jar ym eyn vnd newnczegistinn jare, am nesthen dinstage vor sante Elyzabeth tage. Do by syn gewest vnser getrouwen lyben her Bernhard von Furstensteyn, her Grunhowpt von Czedelicz, Hannus Cranch, Nitsche von der Ossla, Nicclos Syfridisdurff, Burgult Slewicz, Mathis Dameansdorff vnd her Thomas Gythan, vnser schriber, dem wir desin briff beuolen czuschriben.

Altes Privilegb. p. 46.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866